Txoj hauv kev yuav tham nrog koj tus kws kho mob txog kev kho tus mob

Txhua tus neeg puas leej tau ntsib txoj kev mob, tab sis nws tuaj yeem piav qhia tau nyuaj heev. Nov yog qee cov cuab yeej los pab kom koj paub txog hom mob uas koj tab tom ntsib thiab piav qhia tau zoo kom koj tau txais txoj kev saib xyuas raug thiab tau txais kev txhawb nqa raws sij hawm. 

Cov Ntsiab Lus

Qee lub sij hawm, txhua tus raug nug nqe lus nug tseem ceeb no: Koj sim piav qhia seb koj qhov mob yog mob li cas? Los sis: Koj yuav ntsuas koj qhov mob li cas? Ob nqe lus no yog cov lus nug yooj yim uas hnov tau tias teb nyuab tiag tiag li. Txawm hais tias koj cov lus teb yuav tsis txiav txim tag nrho koj txoj kev saib xyuas los, nws yeej yog ib qho cuab yeej pab tau zoo uas cov kws kho mob siv kom to taub tias muaj dab tsi tshwm sim thiab txiav txim siab seb lawv yuav pab tau li cas. Vim li no peb thiaj xav pab ua kom qhov kev sib tham no yooj yim dua. Kev to taub qhov mob thiab muaj peev xwm piav qhia tau meej yuav pab tau koj thiab tus kws kho mob ob leeg tib si.

Kev to taub qhov mob

Muaj ob hom mob

Piav qhia qhov mob nyuam qhuav tshwm sim

Qhov mob yog ib qho laj thawj uas feem ntau ua rau tib neeg mus ntsib kws kho mob. Qhov mob nyuam qhuav tshwm sim yog koj lub cev qhov kev ceeb toom xa xov tias muaj qee yam tsis raug lawm.

Qhov mob nyuam qhuav tshwm sim tuaj yeem mob me me thiab mob ib pliag xwb, los sis nws tuaj yeem mob hnyav heev thiab mob ntev txog ntau hnub los sis ntau lub lim tiam. Qhov mob nyuam qhuav tshwm sim tuaj yeem tshwm sim los ntawm kev raug mob, kev kis mob lossis muaj kab mob. Qhov mob no tuaj yeem mob chob nkuav, ncus tej teg, mob ntsia ntsees, mob tshee hnyo los sis mob ntxais tej zag. Feem ntau lawm yuav ploj mus thaum kho tau qhov ua rau mob. Qhov mob nyuam qhuav tshwm sim uas tsis zoo zuj zus tuaj yeem ua qhov mob kho zoo tsis tu qab.

Yog ib qho tseem ceeb heev uas tsis txhob las mees qhov mob vim qhov no yog koj lub cev qhia koj kom so me ntsis thiab saib xyuas qhov ua rau mob. Kev las mees qhov mob yuav ua rau tus neeg ua hauj lwm hnyav dhau, sai dhau thiab ua ntej lawv lub cev yuav zoo rov qab los.

Nco ntsoov: Qhov mob raug suav tias yog ib feem ntawm cov txheej txheem kev kho kom zoo los.

Kev mob yog ib qho tsis kaj siab. Nws tuaj yeem yog qhov kev xav. Kev mob tuaj yeem yog vim qee yam mob xws li mob nkeeg los sis raug mob. Koj xav li cas thiab hnov ​​mob li cas yog nyob ntawm qhov ua rau mob thiab ob peb yam ntawm tus kheej lub cev, xws li:

  • Koj hom cag keeb thiab seb koj lub cev hnov tau sai npaum li cas rau qhov mob 
  • Cov cwj pwm kev noj haus, kev tawm dag zog, kev so kom txaus thiab pw tsaug zog 
  • Keeb kwm ntawm cov teeb meem kev noj qab haus huv 
  • Kev nyuab siab thiab kev ntxhov siab 
  • Cov kev paub dhau los nrog qhov mob 
  • Lub cev, puas siab puas ntsws thiab lwm yam kev sib raug zoo xws li kev ntseeg ntuj los sis kev ntxhov siab txog nyiaj txiag 

Piav qhia qhov mob kho zoo tsis tu qab

Qhov mob kho zoo tsis tu qab tuaj yeem tshwm sim txhua hnub thiab txuas ntxiv mus nto hlis los sis ntau xyoo. Feem ntau nws raug piav qhia tias mob ntev li peb lub hlis los sis ntev dua. Qhov mob kho zoo tsis tu qab tuaj yeem mob me mus rau qhov hnyav thiab tuaj yeem mob tsis tu ncua los sis mob mus zoo. Qhov mob no tuaj yeem mob qhuav qhawv, tshee hnyo, kub lug los sis mob.

Tib neeg muaj qhov mob sib txawv. Ib qho kev raug mob los sis mob nkeeg uas mob heev rau ib tus neeg tej zaum yog ib qho mob me ntsis rau lwm tus neeg xwb thiab.

Nkag siab txog koj qhov mob thiab koj tus kheej qhov kev paub dhau los yog qhov tseem ceeb. Ua hauj lwm nrog koj tus kws kho mob los tsim ib txoj kev npaj tswj hwm qhov mob kom ua tau raws li koj cov kev xav tau.

Kev Tswj Mob

Nrog koj tus kws kho mob sib tham txog qhov mob

Koj puas tau raug mob dua los yog koj puas tab tom npaj rau kev phais mob? Kev zoo rov qab los yuav sib txawv rau txhua tus neeg, tab sis yeej yuav muaj qee qhov mob xwb li. Nrhiav kom paub txog koj cov kev xaiv tswj kev mob los ntawm kev tham nrog koj tus kws kho mob.

Koj qhov mob yuav tsum raug tswj kom txog qhov koj tuaj yeem taug kev mus siv chav dej, zaum hauv lub rooj zaum thiab hnoos taus. Koj yuav tsum tsis txhob noj tshuaj kom ua rau koj tsis nco qab dab tsi li lawm. Nov yog qee cov lus qhia los pab koj tham nrog koj tus kws kho mob txog koj qhov mob tias zoo li cas. 

Cov lus nug koj tuaj yeem nug tau

  • Kuv yuav mob ntev npaum li cas tom qab kuv raug mob los sis phais mob? 
  • Muaj kev xaiv dab tsi rau xaiv los kho kuv qhov mob? 
  • Ib qho ntawm cov kev xaiv kho mob no puas tuaj yeem ua rau muaj kev cuam tshuam tsis zoo nrog lwm cov tshuaj uas kuv noj? 

Yog tias koj thiab koj tus kws kho mob txiav txim siab tias qhov tshuaj tswj mob uas muaj yeeb yog kev xaiv kho mob zoo tshaj plaws, ces nug cov lus nug hauv qab no

  • Dab tsi yog cov kev pheej hmoo thiab kev mob tshwm sim los ntawm kev noj tshuaj opioid? 
  • Puas muaj cov tshuaj yuav saum txee muag tshuaj (xws li Advil®) uas kuv tuaj yeem xaiv noj tau? 
  • Kuv yuav tsum noj tshuaj opioid pes tsawg hnub? 
  • Yog tias kuv hnov zoo zog lawm kuv puas tuaj yeem tso tseg tsis noj tshuaj? 
  • Kuv lub cev xeeb tub. Kuv puas tsim nyog noj tshuaj txo qhov mob? 

Theem mob, qhov ntev thiab qhov ua rau mob

Qhia kom meej meej. Qhia rau tus kws kho mob paub tias nws tsis yog koj "lob nrob qaum" nkaus xwb thaum nws mob ntawm koj "lub duav thiab qee zaum mob rau nram koj ob txhais ceg." Yog tias koj qhov mob txawj txav mus los, qhia koj tus kws kho mob txhua qhov chaw uas tuaj yeem ua rau mob heev thiab qhov chaw uas mob feem ntau. 

Rub thiab luam tawm ib daim ntawv qhia lub cev los kos voj voom ncig koj qhov chaw mob

Feem ntau, tib neeg yuav ntsib ib los sis ob qhov "hnov" mob. Qee lub sij hawm hnov muaj ntau qhov mob sib txawv. Hom mob feem ntau kheev pom muaj yog:

  • Mob ntsia ntsees
  • Mob kub lug los yog cuag kub hnyiab
  • Txias zias
  • Chwv / kov hnov mob rhiab nkuav
  • Hnov loog, hnov rhiab, mob chob thiab zoo li koob chob

Qhia rau tus kws kho mob kom paub meej ntau dua es tsis txhob tsuas yog hais tias koj "ib txwm" mob, los sis mob "qee zaum" li no xwb. Sim hais qee yam xws li:

"Kuv ib txwm hnov ​​mob mob hauv qhov chaw no, tab sis nws mob hnyav dua thaum sawv ntxov thiab nws mob ntev li ib teev."

Xav txog koj qhov mob thiab teb cov lus nug no:

  • Koj puas hnov ​​mob heev thaum koj tsim dab ntub los thawj zaug thiab hnov ib ce txhav, los sis puas yog qhov mob zoo li hnyav dua qub tuaj thaum lub sij hawm hauv lub hnub dhau mus? 
  • Koj puas hnov qhov mob chob nkuav thaum hnav khaub ncaws thaum sawv ntxov ces ho ploj mus tom qab 10 feeb? 
  • Qhov mob puas nyob ntev li ob peb teev los sis nws puas zoo zog tuaj tom qab koj pw ib pliag? 
  • Koj qhov mob puas ua rau koj tsis tuaj yeem ua tej hauj lwm ub no uas ib txwm muaj los sis tej yam uas koj xav ua? 

  • Xav txog qhov mob ntsig txog lub sij hawm ntawm cov tshuaj noj: Puas yog qhov mob hnyav dua los sis zoo zog tuaj tom qab koj noj qee yam tshuaj, los sis nws zoo li tsis cuam tshuam dab tsi nrog cov tshuaj li lawm? 
  • Puas yog koj qhov mob hnyav dua tuaj thaum koj ua qee yam hauj lwm xws li nce thiab nqis ntaiv, kav khw hauv khw muag khoom noj, nqus plua plav tsev, thiab lwm yam? 
  • Puas yog qhov mob tshwm sim thaum hnav khaub ncaws chwv koj lub cev los sis thaum ib tus neeg khawm koj? Los yog nws tsuas yog tshwm sim tsis muaj chaw? 
  • Puas yog qhov mob hnyav dua qub tuaj vim los ntawm kev ntxhov siab - xws li tom qab koj qhib cov ntawv sau nqi? 
  • Koj puas pom txoj kev nyob nrog ib puag ncig ntawm cov neeg sib txawv thiab qhov tias qhov mob zoo zog tuaj los sis phem dua qub tuaj?
  • Xav txog lwm lub sij hawm thaum koj qhov mob zoo li zoo zog tuaj los yog phem dua qub. 

Txhua tus neeg hnov mob sib txawv yog li nws tseem ceeb heev uas yuav tau piav qhia rau koj tus kws kho mob seb koj hnov qhov mob zoo li cas. Qee zaum cov theem ntsuas qhov mob, zoo li hauv qab no, tuaj yeem pab koj piav qhia qhov mob ntawm koj tus mob.

Cia siab tias cov lus qhia no yuav pab koj xav txog koj qhov mob ua ntej tham nrog tus kws kho mob, thiab thaum kawg ua kom yooj yim rau piav qhia koj qhov mob thiab kom tau txais kev pab. Koj tus kws kho mob yuav tham nrog koj txog koj cov kev xaiv rau kev kho mob. 

Cov ntaub ntawv no raug tsim los ua kev sib koom tes sab kev noj qab haus huv ntawm pej xeem ntawm Blue Cross thiab Blue Shield ntawm Minnesota, Health Partners, UCARE, Hennepin Health, Medica thiab South Country Health Alliance. Luam tawm thawj zaug thaum lub Kaum Ob Hlis Ntuj 2019 ntawm stratishealth.org.