Kev hnov ntshai qee zaum yog qhov ib txwm tshwm sim. Yog tias qhov kev xav tsis tu ncua thiab ua rau muaj teeb meem nrog kev ua hauj lwm, tsev kawm ntawv, los sis kev sib raug zoo, tej zaum nws yuav yog lub sij hawm los tham nrog tus kws kho mob tshaj lij kev saib xyuas kho mob txog koj qhov kev ntxhov siab. Koj tuaj yeem nrhiav kev saib xyuas kho mob ntawm tus kws kho mob tshwj xeeb hauv kev kho kev ntxhov siab thiab leej twg nyob hauv koj lub koom haum Blue Cross los sis Blue Plus txoj phiaj xwm kho mob los ntawm kev siv peb cov cuab yeej Nrhiav Ib Tus Kws Kho Mob.
Dab tsi yog cov cim ntawm kev ntxhov siab?
Cov tsos mob tej zaum yuav hnyav, me ntsis los sis tsis xwm yeem. Nrhiav ib los sis ntau qhov ntawm cov cim no:
Kev xav
- Hnov tau tias tsis xis nyob los sis ntshai
- Hnov tau tias nkees los sis chim siab
- Ib txwm cia siab yam uas phem tshaj plaws
- Kev tsom xam nyuaj
Lub cev
- Lub plawv dhia nrawm los sis dhia ceev
- Txog siav
- Mob plab
Cov neeg uas muaj kev ntxhov siab yuav zam tau cov xwm txheej uas ua rau lawv hnov tau cov tsos mob no. Yog tias cov tsos mob hnyav heev, koj tuaj yeem ntsib kev ntxhov siab, tseem hu ua kev ceeb ntshai.
Dab tsi yog cov cim qhia ntawm kev ntxhov siab los sis kev ceeb ntshai?
Kev ntxhov siab los sis kev ceeb ntshai tshwm sim tam sim ntawd. Qhov kev tawm tsam tuaj yeem hnyav heev uas ntau tus neeg xav tias nws muaj qhov yuav ua rau plawv nres. Thaum muaj kev tawm tsam, cov tsos mob ntawm lub cev thiab lub siab xav tuaj yeem yuav tshwm sim:
- Lub plawv dhia nrawm
- Tawm hws, ntshai los sis tshee
- Txog siav
- Mob hauv siab
- Hnov tau tias kiv taub hau los sis dias taub hau
- loog los sis rhiab
- Hnov tau tias daig caj pas
- No los sis kub tawm hws
- Xeev siab los sis mob plab
Yuav kho kev ntxhov siab li cas?
Cov tsos mob ntxhov siab yog kho yooj yim. Kev sab laj thiab tshuaj kho mob yog ib txoj hauv kev los kho kev ntxhov siab. Koj tuaj yeem nrhiav kev kho mob los ntawm:
- Tus kws kho mob hlwb- Tus kws kho mob uas tham txog koj cov tsos mob nrog koj thiab tuaj yeem sau tshuaj yog tias koj xav tau.
- Tus Kws Tshaj Lij Txog Kev Puas Hlwb Muaj Ntawv Tso Cai - Tau kawm tiav Kws Kho Mob (Doctorate) los sis Kws Tshaj Lij (Master) xws li kws kho mob hlwb, cov neeg ua hauj lwm sib raug zoo, kev sib yuav thiab cov kws kho mob hauv tsev neeg thiab cov kws pab tswv yim uas yuav kho kev puas siab puas ntsws thiab kev puas hlwb, tab sis feem ntau tsis tuaj yeem sau tshuaj.
Tus kws kho mob xub thawj tuaj yeem tham txog koj cov tsos mob thiab sau ntawv yuav tshuaj. Kev tswj hwm kev ntxhov siab, kev xav thiab pab pawg txhawb nqa tuaj yeem pab tswj cov tsos mob ntawm kev ntxhov siab ib yam nkaus.
Hom kev ntxhov siab nws sib txawv li cas?
Nws yog ib qho tseem ceeb los tham txog tag nrho koj cov tsos mob nrog koj tus kws kho mob vim tias muaj ntau hom kev ntxhov siab. Nws tuaj yeem txiav txim siab zoo dua ntawm txoj phiaj xwm kho mob zoo thaum koj tham txog txhua yam tsos mob.
- Kev Ntxhov Siab Feem Ntau - Kev ntxov siab hnyav txog kev ua hauj lwm txhua hnub uas kav ntau lub hlis
- Cov Tsos Mob Kev Ceeb Ntshai- Cov tsos mob txaus ntshai tsis tu ncua uas suav nrog kev ntxhov siab ntawm lub cev thiab lub siab
- Kev Ntxhov Siab Nyob Nrog Lwm Tus - Kev ntshai ntawm cov xwm txheej hauv zej zog uas ib tus neeg yuav txaj muag, txiav txim los sis tsis lees paub
- Kev Siv Zog Tswj Hwm Qhov Uas Ua Tsis Sib Haum Xeeb- Kev xav rov ua dua, lub tswv yim los sis kev xav uas ua rau tus neeg muaj txoj kev xav ua ib yam dab tsi ntau zaus
- Xwm Txheej Kev Nyuaj Siab Uas Cuam Tshuam Nrog Qhov Tsis Meej Pem - Kev xav hnyav los sis ntxhov siab thiab kev xav uas cuam tshuam txog qhov xwm txheej raug mob los sis tau ntsib los
Txoj phiaj xwm kho mob ua raug duav roos rau kev ntxov siab
Blue Cross thiab Blue Plus cov phiaj xwm kev noj qab haus huv feem ntau duav roos rau cov kev pab cuam kev puas hlwb. Kev duav roos yuav txawv rau txhua txoj phiaj xwm thiab sib txawv rau cov kev pab cuam kho mob hauv tsev kho mob los sis tus neeg mob sab nraud. Nws yog qhov zoo tshaj kom hu rau tus npawb pab cuam cov qhua nyob sab nraub qaum ntawm koj daim npav txheeb xyuas tus kheej kom tau txais cov ntsiab lus ntxaws hais txog koj cov txiaj ntsig ntawm txoj phiaj xwm.
Cov phiaj xwm kev noj qab haus huv feem ntau duav roos rau cov tshuaj uas kho kev ntxhov siab. Tshawb xyuas koj cov txiaj ntsig tshuaj muaj ntawv yuav tshuaj, suav nrog tus qauv tshuaj (cov npe tshuaj uas raug duav roos), kom paub tseeb tias koj daim ntawv yuav tshuaj raug duav roos lawm.
Qee qhov ntawm Blue Cross cov phiaj xwm suav muaj cov txheej txheem pab cuam kho mob hauv online
Qee cov phiaj xwm ntawm Blue Cross los sis Blue Plus muab cov kev pab cuam hauv online uas yog cov kev xaiv tus nqi qis dua los pab kho cov tsos mob ntawm koj txoj kev ntxov siab.
- Learn to Live yog ib qho kev pab cuam Kev Kho Tus Cwj Pwm Txog Kev Kawm Paub (Cognitive Behavioral Therapy, CBT) hauv online uas raug duav roos los ntawm qee cov phiaj xwm ntawm Blue Cross thiab Blue Shield ntawm Minnesota. Qhov kev pab cuam no pib nrog kev ntsuam xyuas hauv online, thiab tom qab ntawd cov neeg mob ua tiav cov kev kawm rau cov xwm txheej tshwj xeeb kom paub txog qhov teeb meem thiab qhia lawv tias yuav ua li cas thiaj tswj nws kom zoo dua.
- Doctor On Demand yog kev pab cuam hauv online. Koj tuaj yeem mus ntsib nrog tus kws kho mob hlwb uas tau muaj daim ntawv tso cai los sis tus kws kho mob hlwb uas muaj ntawv pov thawj los ntawm kev siv cov vis dis aus hauv koj lub xov tooj, lub tablet los sis lub khoos pis tawj. Cov muab kev pab cuam kho mob puas hlwb muaj nyob rau ntawm kev teem caij rau kev pab nrog kev ntxhov siab.
Thov tiv tauj rau tus naj npawb pab cuam rau cov neeg siv khoom nyob sab nraum ntawm koj daim npav txheeb xyuas tus kheej txhawm rau txheeb xyuas qhov kev duav roos.
Xav paub ntau ntxiv txog tej yam kev mob hlwb thiab kev duav roos
Cov tsos mob ntawm kev nyuaj siab thiab kev kho mob
Kev duav roos kho mob coj tus cwj pwm thiab kev puas hlwb
Kev tswj cov tsos mob kev ntxhov siab